Friday, February 27, 2009

काजू वडी

जिन्नस:

काजूची पूड २ वाट्या
साखर दीड वाटी
रिकोटा चीझ २ चमचे
साजुक तूप पातळ करून ४ चमचे



क्रमवार मार्गदर्शनः मध्यम आचेवर कढई तापत ठेवा. त्यात दीड वाटी साखर व साखर पूर्णपणे बुडून थोडे वर पाणी घाला. थोडी आच वाढवा. मिश्रण चांगले उकळू दे. अधुनमधून कालथ्याने ढवळत रहा. आणि एकीकडे त्यातले काही थेंब एका वाटीत काढून पाक कितपत घट्ट होत आहे त्याचा अंदाज घ्या. एकतारी पाक झाला की त्यात साजुक तूप, रिकोटा चीझ व काजूची पूड घालून ढवळा. हे मिश्रण सारखे ढवळत रहा. काही वेळाने हे सर्व मिश्रण एकत्रित होऊन एकसंध होते. थोडे घट्ट लागायला लागते. तरीसुद्धा खूप घट्ट होत नाही. पूर्ण गंधासारखे एकजीव झाले की गॅस बंद करा. नंतर काही वेळ कालथ्याने हे मिश्रण ढवळा.

ताटलीला तुपाचा हात लावून त्यात हे मिश्रण ओता. ओतले की हे मिश्रण पसरायला लागेल. थोडे जास्त पसरण्यासाठी ताटली हाताने थोडी सर्व बाजूने वाकडी करा म्हणजे मिश्रण ताटलीभर पसरून त्याची पातळी एकसारखी होईल. हे मिश्रण ओतल्यावर लगेचच कोरडे पडायला लागते, त्यामुळे कोमट असतानाच वड्या पाडा. हे मिश्रण लगेच गारही होते. वड्या काढताना अलगद हाताने काढाव्या लागतात नाहीतर लगेच तुटतात इतके मिश्रण कोरडे पडते.



या वड्या पटकन होतात. मी या वड्यामध्ये रोस्टेड काजू वापरले आहेत त्यामुळे रंग पांढरा आला नाही. वॉलमार्टमध्ये खारट नसलेले काजू मिळतात ते वापरले आहेत. जिथे इंडियन स्टोअर्स नाही तिथे हा पर्याय आहे. कारण अमेरिकेत सर्व ठिकाणी रोस्टेड व सॉल्टेड काजू मिळतात. या वड्या मी पहिल्यांदाच केल्या आहेत. मला वाटते की अजून थोडे तूप घातले तर जास्त नितळ होतील.

Tuesday, February 24, 2009

टोमॅटो कांदा कोशिंबीर



जिन्नसः


लाल टोमॅटो २ लहान आकाराचे
कांदा अर्धा
हिरव्या मिरच्यांचे तुकडे २-३
चिरलेली हिरवीगार कोथिंबीर
दाण्याचे कूट १ चमचा
मीठ
साखर पाव चमचा



क्रमवार मार्गदर्शन : टोमॅटो व कांदा खूप बारीक चिरा. त्यात दाण्याचे कूट, चवीप्रमाणे मीठ, थोडी साखर व थोडी कोथिंबीर घाला. मिरच्यांचे तुकडे हाताने चुरडून घाला. सर्व मिश्रण एकसारखे ढवळा. एक चविष्ट कोशिंबीर तयार होईल. बटाट्याच्या काचऱ्या व पोळीबरोबर ही कोशिंबीर जास्त छान लागते.




Saturday, February 21, 2009

सँडविच



जिन्नस:


स्लाइस ब्रेड
बटर/साजुक तूप
बटाटावड्याचे सारण

बटाटावड्याचे सारण : बटाटे उकडून, त्याची साले काढुन कुस्करुन घ्यावेत. त्यात कांदा, लसुण पाकळ्या, मिरच्या व कोथिंबिर खूप बारीक चिरुन घालणे, लिंबू पिळावे. चवीपुरते मीठ व साखर घाला. ह्या सर्व मिश्रणाचा लगदा करा. हे बटाट्याचे सारण तसेच कच्चे राहु देत.


क्रमवार मार्गदर्शन: ब्रेडच्या कडा काढा. एका स्लाइसवर बटर/साजुक तूप लावा. एका स्लाइसवर बटाटावड्याचे सारण पसरवून लावा. थर पातळ/जाड आवडेल तसा. नंतर हे स्लाइस एकमेकांवर ठेवून सँडविच टोस्टर मध्ये भाजून घ्या. गरमागरम टोमॅटो केच अप अथवा सालसा बरोबर खा.

Tuesday, February 17, 2009

कोबी लेट्युस कोशिंबीर

वाढणी: ज्या प्रमाणात खाल त्याप्रमाणात
पाककृतीला लागणारा वेळ: १५ मिनिटे
पाककृतीचे जिन्नस: गुलबक्षी रंगाचा कोबी, लेट्यूस दही, मीठ, साखर


क्रमवार मार्गदर्शन: गुलबक्षी रंगाचा कोबी किसून घेणे. लेट्युस खूप बारीक चिरणे. यात दही मिसळणे. चविप्रमाणे मीठ व साखर घालून ढवळणे. कोबीचा गुलबक्षी रंग, लेट्युसचा हिरवा रंग आणि दह्याचा पांढरा रंग अशी ही रंगीबेरंगी दिसणारी कोशिंबीर चवीला चांगली लागते आणि करायलाही सोपी.

Friday, February 13, 2009

मसालेभात

जिन्नसः

बासमती तांदुळ १ वाटी
३ वाट्या पाणी
जाड चिरलेला कांदा पाव
मोठी फ्लॉवरची फुले ५-६
जाड चिरलेला बटाटा पाव
मटार पाव वाटी
२-३ मिरच्यांचे जाड तुकडे
लाल तिखट अर्धा चमचा
धनेजीरे पूड अर्धा चमचा
मिरपूड अर्धा चमचा
फोडणी साठी तेल मोहरी, जीरे, हिंग, हळद
मीठ


क्रमवार मार्गदर्शन:


प्रथम तांदुळ धूउन घ्या. त्यातील पाणी पूर्णपणे काढून टाका. पाणी पूर्णपणे निथळण्यासाठी चाळणीत तांदुळ घालून ठेवा. मध्यम आचेवर कूकर तापत ठेवा. तो तापला की त्यात जरूरीपुरते थोडे तेल घाला. ते तापले की त्यात मोहरी, जीरे, हिंग हळद घालून त्यात आधी मिरच्यांचे तुकडे व कांदा घाला. थोडे परता. मग त्यात बटाटा, फ्लॉवर, मटार घाला. नंतर तांदुळ घालून परत एकदा नीट ढवळून घ्या. नंतर त्यात लाल तिखट, धनेजीरे पूड, मीरपूड व चवीपुरते मीठ घालून परत एकदा नीट ढवळून घ्या. नंतर त्यात पाणी घालून कुकरचे झाकण लावा. एक शिट्टी झाली की गॅस बंद करा.


हा मसालेभात गरम गरम खायला चांगला लागतो. सोबत कांदा, काकडी व टोमॅटोचे काप घ्या. थंडगार दही, लसूण चटणी, उडदाचा भाजलेला/तळलेला पापड घ्या.

गाजर वडी



जिन्नस:


किसलेले गाजर अडीच वाट्या (गाजराची साले काढून घ्या. )
साखर २ वाट्या
रिकोटा चीझ अथवा खवा पाऊण वाटी
साजूक तूप पाव वाटी



क्रमवार मार्गदर्शन:



मध्यम आचेवर एका कढईत साजूक तूप व किसलेले गाजर घालून परतून घ्या. नंतर त्यावर झाकण ठेवा म्हणजे वाफेवर गाजर शिजेल. झाकण काढून परत एकदा कालथ्याने परता. असे २-४ वेळा करा म्हणजे गाजर व्यवस्थित शिजेल. गाजर शिजण्याकरता पाण्याचा वापर करू नका.



आता हे शिजलेले गाजर एका भांड्यात काढून ठेवा. त्याच कढईत २ वाट्या साखर घाला. साखर पूर्णपणे बुडून अगदी थोडे वर राहील इतके पाणी घाला. आच मध्यम असू देत. साखर विरघळायला लागेल. एकीकडे चमच्याने हलवत रहा. व अधुनमधून यातले काही थेंब एका वाटीत काढून पाक कसा होत आहे त्याचा अंदाज घ्या. एकतारी पाक करा. एकतारी पाक झाला की २-३ मिनिटांनी त्यात शिजवून घेतलेले गाजर व रिकोटा चीझ घाला. रिकोटा चीझ घट्ट असते ते कालथ्याने पूर्णपणे मोडून घ्या. कालथ्याने हे मिश्रण ढवळत रहा. या मिश्रण काही वेळाने खूप उकळायला लागेल.



आता थोडी आच वाढवा. आता हे मिश्रण एकत्र होऊ लागेल व आटायला लागेल. हे मिश्रण खूप आटवायला लागते. त्याकरता कालथ्याने सतत ढवळावे लागते. काही वेळाने हे मिश्रण कोरडे पडायला लागेल. आता गॅस बंद करा व बाजूच्या शेगडीवर कढई ठेवून सतत हे मिश्रण ढवळ रहा. काही वेळाने या मिश्रणाचा कोरडा गोळा तयार होईल. आता हा गोळा एका तूप लावलेल्या ताटलीत काढून तो लगेच एकसारखा थापा. थापण्याकरता एक पातळ प्लॅस्टिकचा कागद तूपाचा हात लावून घ्या. मिश्रण कोमट झाले की वड्या पाडा. खूप गार झाल्यावर वड्या डब्यामध्ये काढून ठेवा.




वड्या पहिल्यांदाच करत आहे. प्रयोग चालू आहेत त्यामुळे सफाई थोडी कमी आलेली आहे. पण या वड्या खायला खुसखुशीत लागतात. व गाजराच्या असल्याने रंगही छान येतो.

Wednesday, February 11, 2009

मसाला चिप्स (१)



जिन्नस:


टॉरटिला चिप्स (tostitos)
बटाटावड्याचे सारण
बारीक चिरलेला लेट्युस
बारीक चिरलेली काकडी
सालसा
किसलेले चीझ
मीठ व साखर चवीपुरते
शेंदरी रंगाच्या गाजराचे बारीक गोल काप साले काढून(सजावटीसाठी)
पालकाची छोटी पाने (सजावटीसाठी)



बटाटावड्याचे सारण: बटाटे उकडून, त्याची साले काढून कुस्करून घ्यावेत. त्यात कांदा, लसुण पाकळ्या, मिरच्या व कोथिंबिर खूप बारीक चिरून घालणे, लिंबू पिळावे. चवीपुरते मीठ व साखर घालावे, व ह्या सर्व मिश्रणाचा लगदा करावा. हे बटाट्याचे सारण तसेच कच्चे राहू देत.



क्रमवार मार्गदर्शन : सर्वात आधी एका डीशमध्ये गाजराचे गोल व बारीक काप ठेवा. मध्यावर पालकाची पाने लावून घ्या. मग त्यावर एकेक टॉरटिला चिप्स ठेवा. नंतर प्रत्येक चिप्स मध्ये सर्वात आधी बटाट्याचे सारण घाला. नंतर चिरलेला लेट्युस व काकडी घाला. नंतर सालसा व सर्वात शेवटी किसलेले चीझ घाला. चवीसाठी थोडे मीठ व साखर पेरा.अशी ही एक छान सजलेली चमचमीत डीश तयार होईल.


Tuesday, February 03, 2009

काकडी टोमॅटो कोशिंबीर

1 लहान लाल टोमॅटो व एक लहान काकडी बारीक चिरा. त्यात एक चमचा दाण्याचे कूट, चिमुटभर लाल तिखट, पाव चमचा साखर, २ चमचे दही व चवीपुरते मीठ घाला. थोडी हिरवीगार कोथिंबीर चिरून घाला. सर्व मिश्रण चमच्याने एकत्रित करा. एक चविष्ट कोशिंबीर तयार होईल!

Saturday, January 31, 2009

मसाला चिप्स (२)


जिन्नस:



टॉरटिला चिप्स (Tostitos)
बटाटावड्याचे सारण
चिंचगुळाचे दाट पाणी
लाल तिखट
धनेजीरे पूड
मीठ
साखर
लिंबू
बारीक शेव
कोथिंबीरीची पाने (सजावटीसाठी)
बारीक चिरलेला कांदा
बारीक चिरलेला टोमॅटो


बटाटावड्याचे सारण: बटाटे उकडून, त्याची साले काढुन कुस्करुन घ्यावेत. त्यात कांदा, लसुण पाकळ्या, मिरच्या व कोथिंबिर खूप बारीक चिरुन घालणे, लिंबू पिळावे. चवीपुरते मीठ व साखर घालावे, व ह्या सर्व मिश्रणाचा लगदा करावा. हे बटाट्याचे सारण तसेच कच्चे राहु देत.


सर्वात आधी एका डीशमध्ये कोथिंबिरीची पाने सजावटीसाठी घाला. नंतर एकेक टॉरटीला चिप्स ठेवून त्यात आधी बटाटावड्याचे सारण व चिंचगुळाचे दाट पाणी घाला. नंतर बारीक चिरलेला कांदा व टोमॅटो घाला. किंचित लाल तिखट, धनेजीरे पूड पेरा. चवीप्रमाणे थोडे मीठ व थोडी साखरही पेरा. नंतर एकेका पुरीमध्ये थोडी बारीक शेव घाला. नंतर अगदी थोडे लिंबू पिळा.


ह्या चिप्स पाणीपुरीच्या पुरीला एक पर्याय होऊ शकतो. जसे आपण शेव बटाटा पुरी खातो याप्रमाणेच असे करूनही खाता येईल.

Saturday, January 24, 2009

दाण्याचे लाडू

जिन्नस

दाण्याचे कूट २ वाट्या
साखर १ वाटी
साजूक तूप पातळ ७-८ चमचे


वरील सर्व जिन्नस एकत्र करून लाडू वळा. तूप घालताना आधी थोडेसेच घालावे. मिश्रण एकत्र करून लाडू वळून पाहावा. नीट वळला गेला नाही तर अजून तूप घालावे. जास्त तूप झाले तरीही हे लाडू बेसनाच्या लाडवांप्रमाणे बसतात! दाणे भाजण्याची गरज नाही. भारतात भट्टीतून दाणे भाजून मिळतात. अमेरिकेत भाजक्या शेंगा मिळतात. दाण्याची टरफले काढून कूट करा. असे हे झटपट लाडू तय्यार!


ह्यात थोडा गूळही छान लागतो. खमंगपणा येतो. पूर्ण गुळाचेही छान लागतात. तसेच यात आवडीनुसार सुकामेव्याची पूडही घालू शकता. मनुका बेदाणे घाला. आपापल्या आवडीप्रमाणे सजवा! पण मला फक्त नुसते दाण्याच्या कुटाचेच लाडू आवडतात!

Friday, January 23, 2009

गाजर टोमॅटो कोशिंबीर

२ लहान लाल टोमॅटो व एक लहान शेंदरी गाजर बारीक चिरा. त्यात एक चमचा दाण्याचे कूट, चिमुटभर लाल तिखट, पाव चमचा साखर, २ चमचे दही व चवीपुरते मीठ घाला. थोडी हिरवीगार कोथिंबीर चिरून घाला. सर्व मिश्रण चमच्याने एकत्रित करा. एक चविष्ट कोशिंबीर तयार होईल!

Friday, January 16, 2009

फ्रूट सॅलड





जिन्नस :
३ वाट्या दाट दूध (whole milk)
१ वाटी साखर

फळे:

टरबूज
केळी
पपई
सफरचंद
द्राक्षे
pear
संत्री
चिक्कू
अंजीर
डाळिंबाचे दाणे
हापुस आंब्याच्या फोडी
स्ट्रॉबेरी (फक्त सजावटीसाठी)
ब्ल्युबेरी (फक्त सजावटीसाठी)

सुकामेवा:

काजू
बदाम
पिस्ते
मनुका
सुके अंजिर
केशर
खजूर
मध
क्रमवार मार्गदर्शन :

एका पातेल्यात दूध घेऊन ते मध्यम आचेवर तापवत ठेवा. दूध तापले की त्यात साखर घाला व चांगले उकळू द्या. उकळल्यावर दूध वर येईल. डावेने दूध सतत ढवळत रहा. साय येत राहते व दूध आटत जाते. प्रत्येक वेळी साय आली की डावेने मोडून काढा म्हणजे एकसंध दूध दिसेल. दूध निम्मे आटले की गॅस बंद करा. दूध गार झाले की फ्रीज मध्ये ठेवा. एका वाटीत केशर सोडून सर्व सुकामेवा दूधात भिजत घाला व ती वाटी पण फ्रीजमध्ये ठेवा. दूधात भिजत घालताना दूध तापवून घ्या. व ते थंड झाले की त्यामध्ये सर्व सुकामेवा भिजत घाला.

दुसऱ्या दिवशी चित्रात दाखवल्याप्रमाणे सर्व फळे बारीक चिरा. शिवाय थोडा कोरडा सुकामेवा घाला. दूधात भिजलेला सुकामेवाही घाला. नंतर चिरलेल्या फळामध्ये आटीव दूध घाला. केशराच्या काड्या तव्यावर/कढल्यात गरम करून त्या गार दूधात चुरडून ते दूध घाला. रंग छान येतो. दुध थोडे व फळे जास्त असे प्रमाण आहे. पण सर्व फळे दूधामध्ये बुडतील इतपत दूध घाला. फळे आवडीप्रमाणे कमी जास्त घालावी.

स्ट्रॉबेरी व ब्ल्युबेरी फक्त सजावटीसाठी आहेत. आंबट फळे दूधात घालू नयेत. आंबटगोड फळे चालतील. शिवाय यामध्ये थोडा मधही घाला. आवडीप्रमाणे दूध जर जास्त दाट हवे असेल तर त्यात कस्टर्ड पावडर, मिल्क पावडर अथवा कंडेन्स्ड मिल्क घालू शकता.

असे हे फ्रूट सॅलड तयार झाले की परत फ्रीजमध्ये ठेवा. थंडगार फ्रूट सॅलड छान लागते. जेवणानंतर खाण्याची ही एक स्वीट डीश आहे. हे फ्रूट सॅलड काचेच्या कपातून खायला द्यावे ज्यातून आपण आयस्क्रीम खातो. वरील प्रमाणात चार जणांची स्वीट डीश होते.


Saturday, January 03, 2009

तुरीच्या डाळीची आमटी


जिन्नस:


१ वाटी शिजलेली तुरीची डाळ
दीड चमचा लाल तिखट
दीड चमचा गोडा/काळा/गरम मसाला
चिंचगुळाचे दाट पाणी अर्धी वाटी
हिरव्या मिरच्यांचे तुकडे ३-४
तेल, मीठ
फोडणीसाठी मोहरी, हिंग, हळद
थोडी चिरलेली कोथंबीर
थोडा खवलेला ओला नारळ


क्रमवार मार्गदर्शन:


मध्यम आचेवर कढई तापत ठेवावी. नंतर त्यात फोडणीसाठी पुरेसे तेल घाला. ते तापले की त्यात मोहरी हिंग व हळद घालून फोडणी करा. लगेच त्यात शिजलेली डाळ डावेने चांगली घोटून घेऊन घाला. लाल तिखट, गोडा/काळा/गरम मसाला जो आवडेल तो किंवा जो उपलब्ध असेल तो घाला. चिंचगुळाचे दाट पाणी व चवीपुरते मीठ घाला. वाटी दीड वाटी पाणी घालून डावेने चांगले ढवळा. नंतर त्यात मिरच्यांचे जाड तुकडे, चिरलेली कोथिंबीर व खवलेला ओला नारळ घालून परत एकदा डावेने आमटी ढवळून घ्या. अजून २-३ वाट्या पाणी घाला. आता आच वाढवा व एक चांगली दणदणीत उकळी आणा. थोड्यावेळाने गॅस बंद करा. (आमटी दाट/पातळ जशी हवी असेल त्याप्रमाणात पाणी घालावे.)


आता एका ताटलीत वाफाळलेला गरम गरम भात घ्या. त्यावर गरम गरम आमटी वाढून घ्या. त्यावर साजूक तूप घाला. सोबत कैरीचे लोणचे घ्या आणि खा. बाहेर मुसळधार पाऊस पडत असेल तर हा गरम आमटी भात जरा जास्त खावासा वाटतो.

Thursday, January 01, 2009

श्रीखंड (2)








दही (Dannon All Natural Plain Yogurt 2 LB)
साखर
वेलची पूड
काजू, पिस्ते, बदाम




एका कॉटनच्या पातळ कपड्यामध्ये दही घाला. कपडा सर्व बाजुने गुंडाळून घेऊन घट्ट बांधा. व हे बांधलेले गाठोडे एका दांडीला रात्रभर टांगून ठेवा. रात्री ९ वाजता टांगून ठेवले तर सकाळी ९ वाजता त्या दह्याचा चक्का तयार होईल. जेव्हा दही गाठोड्यात बांधाल तेव्हा बाहेरूनच हाताने दाब द्या म्हणजे पाणी निथळून जाईल. असे टांगल्यावर काही तासांनी १-२ वेळेला बाहेरून दाबून पाणी निथळून घ्यावे. सकाळी पण गाठोडे उतरवताना थोडे बाहेरुनच पिळून घ्यावे म्हणजे उरलेले सर्व पाणी निथळून जाईल. शेवटी कपड्याच्या बाहेर दही यायला लागेल इथपर्यंत पाणी निथळू द्यावे.




तयार झालेला चक्का एका पातेल्यात काढून घ्या. जितका चक्का तयार होईल तितकी त्यात साखर घालून ढवळा. २-३ तासाने साखर मिसळलेला चक्का पुरणयंत्रातून काढा अथवा चाळणीतून घोटून घ्या. आता नितळ श्रीखंड तयार होईल. त्यात आवडीप्रमाणे वेलची पूड, काजू बदाम पिस्ते घाला. आवडत असल्यात थोडे केशर गरम करून त्याचा चुरा करून अगदी थोड्या दुधामध्ये मिक्स करून घाला.
वरील दह्यामध्ये साधारण दीड ते दोन वाट्या चक्का होतो. साखर मिसळून ३-४ वाट्या श्रीखंड बनते.



तयार दही नसेल तर दुधाला विरजण लावून घरीच दही बनवा व त्याचा वरील प्रमाणे चक्का तयार करा.






Tuesday, December 30, 2008

चकोल्या

जिन्नस :

तुरीची डाळ १ वाटी
गव्हाचे पीठ दीड वाटी
धनेजीरे पूड दीड चमचा
लाल तिखट दीड चमचा
गोडा/काळा/गरम मसाला दीड चमचा
चिंचगुळाचे दाट पाणी अर्धा ते पाऊण वाटी
मोहरी, हिंग हळद
मीठ
फोडणीसाठी तेल
गोटा खोबऱ्याचा एक छोटा तुकडा
१ चमचा जिरे


क्रमवार मार्गदर्शन :


तुरीची डाळ कूकरमध्ये शिजवून घ्या. गव्हाच्या पीठामध्ये थोडे लाल तिखट, हळद, मीठ व थोडे तेल घालून नेहमीप्रमाणेच पोळीला पाहिजे तशी कणिक भिजवा.



तुरीची डाळ थंड झाली की मध्यम आचेवर एका कढईत/पातेल्यात पूरेसे तेल घालून फोडणी करा व त्यामध्ये शिजलेली डाळ एकसारखी करून घाला. त्यात थोडे पाणी घालून लाल तिखट, धनेजीरे पूड, गरम/गोडा/काळा मसाला घाला. चवीपुरते मीठ घालून आमटी ढवळून घ्या. नंतर त्यामध्ये चिंचगुळाचे दाट पाणी घाला. गोटा खोबऱ्याचा एक छोटा तुकडा गॅसवर भाजून घ्या. खूप काळा होईतोवर भाजा. थंड झाला की त्यात थोडे जीरे घालून मिक्सर ग्राईंडर वर बारीक करा व उकळत्या आमटीत घाला. अशी ही मसालेदार आमटी थोडावेळ उकळा. अजून थोडे पाणी घाला. खूप पातळ आमटी नको.



आता गॅस बारीक करा. भिजवलेल्या कणकेचा एक मोठा गोळा घेऊन एक मोठी पोळी लाटा. खूप जाड नको, व खूप पातळ नको. पोळीचे कालथ्याने अथवा कातण्याने चोकोनी काप करा. आता हे काप पटापट आमटीत सोडा व ढवळा. अशा प्रकारे कणकेच्या पोळ्या लाटून व काप करून सर्व काप आमटीमध्ये सोडा. एकीकडे ढवळत राहावे. आता आच थोडी वाढवा. म्हणजे आमटी उकळताना शंकरपाळ्यासारखे जे काप करून आमटीमध्ये सोडलेले आहेत ते शिजतील. ५ मिनिटांनी परत गॅस मंद ठेवा. आता थोडे कच्चे तेल वरून घाला व कढईवर/पातेल्यावर झाकण ठेवा म्हणजे वाफेवर या चकोल्या चांगल्या शिजतील. थोड्यावेळाने झाकण काढा. एक चकोली बाहेर काढून ती हाताने शिजली आहे का नाही ते पहा. चकोल्या शिजायला जास्त वेळ लागत नाही. चकोल्या खूप दाट आहेत असे वाटल्यास थोडे पाणी घालून ढवळा.



आता या चकोल्या गरम गरम असतानाच खा. आणि त्यावर भरपूर साजूक तूप घाला. सोबत कुरडई, सांडगी मिरची अथवा पोह्याचा पापड तळून घ्या. भरपूर पोटभर खा म्हणजे अगदी रात्रीपर्यंत तुम्हाला अजिबात भुक लागणार नाही. हा एक अत्यंत पौष्टीक पदार्थ आहे.


हा माझा एक अत्यंत आवडता खाद्यपदार्थ आहे. यालाच डाळ ढोकळी किंवा वरणफळे असेही नाव आहे.

Friday, December 12, 2008

पुरणपोळी





जिन्नस :
१ वाटी हरबरा डाळ
अर्धी वाटी साखर,
अर्धी वाटी चिरलेला गूळ
कणीक दीड वाटी
मीठ
तेल व पाणी
तांदुळाची पीठी/गव्हाचे पीठ


क्रमवार मार्गदर्शन :

डाळीचे पूरण : १ वाटी हरबरा डाळ पाण्यात धुवून घ्या. त्यात अडीच वाट्या पाणी घालून कूकरमध्ये शिजवून घ्या. वरणभात करण्यासाठी साधारण कूकरच्या ३ शिट्ट्या व्हाव्या लागतात. हरबरा डाळ शिजायला थोडी कठीण आहे म्हणून ५-६ शिट्ट्या करा. कूकर गार झाला की शिजलेली डाळ एका चाळणीमध्ये ओतून घ्या. चाळणीखाली एक ताटली ठेवा म्हणजे डाळीमधले सर्व पाणी निथळून जाईल. डाळीमधले पाणी पूर्णपणे निथळले गेले पाहिजे. डाळ कोरडी झाली पाहिजे. नंतर ही डाळ फूड प्रोसेसर मध्ये घालून बारीक वाटा. बारीक वाटलेली डाळ, गूळ व साखर एका पातेल्यात एकत्रित करून मध्यम आचेवर हे पातेले ठेवा. काही वेळाने साखर व गूळ वितळेल. मिश्रण ढवळत राहा. काही वेळाने हे मिश्रण कोरडे होईल. गॅस बंद करा. मिश्रण पूर्णपणे गार करा.


कणीक भिजवणे व तिंबणे : जेव्हा कूकरला डाळ शिजवत ठेवाल तेव्हा एकीकडे कणीक भिजवून ठेवा. कणीक चाळून त्यात थोडे तेल व मीठ घालून भिजवा. कणीक सैल भिजवा. साधारण १ तासानंतर कणीक तिंबायला घ्या. कणकेमध्ये थोडे थोडे पाणी घालून मळून घ्या. मळताना उजव्या हाताची मूठ करून कणकेला सर्व बाजूने दाब द्या म्हणजे ही कणीक पूर्ण परातभर पसरेल. नंतर त्यात तेल घालून व तेलाचा हात घेऊन परत एकत्रित गोळा बनवा. असे बरेच वेळा केले की कणीक सैल होईल व ती हाताला चिकटायला लागेल व कणकेला थोडी तार सुटायला लागेल. आता फक्त तेल घालून कणीक मळा. तेल घेतल्यामुळे चिकटणार नाही व एकसंध नितळ मळली जाईल आणि आता कणकेचा रंगही बदलायला लागेल. कणीक पांढरी दिसायला लागेल. आता ही कणीक एका पातेल्यात झाकून ठेवा.


नंतर साधारण तासभराने पोळ्या करायला घ्या. मध्यम आचेवर तवा तापत ठेवा. हाताला थोडेसे तेल घेऊन कणकेचा छोटा गोळा घेऊन त्याचा हातानेच छोट्या पुरीएवढा एकसारखा आकार बनवा. आपल्या मुठीत मावेल इतके पूरण घ्या व हा पुरणाचा गोळा त्या छोट्या पुरीएवढ्या केलेल्या आकारामध्ये घालून सर्व बाजूने बंद करून एक गोळा बनवा. नंतर पोलपाटावर थोडे तांदुळाचे पीठ पसरा व त्यावर गोळा ठेवून परत थोडे तांदुळाचे पीठ गोळ्यावर पसरून अगदी हलक्या हाताने कडेकडेने पोळी लाटा. थोडी लाटल्यावर अलगद हाताने उलटी करून उरलेली लाटा. तव्यावर घालून भाजा. तव्यावर पोळी हाताने घालायला जमत नसेल तर लाटण्यावर गुंडाळून घेऊन तव्यावर घाला. पोळी भाजताना कालथ्याचा वापर करा. गुलाबी रंगावर पोळी भाजा.


गरम पोळीवर भरपूर साजूक तूप घ्या व गरम गरम खा. अशी ही तलम पुरणपोळी खूप छान लागते. साखरेचा गोडवा व गुळाचा खमंगपणा अशी दुहेरी चव!

मला फार गोड आवडत नाही म्हणून साखर गुळाचे प्रमाण एकास एक दिले आहे. पण गोड हवे असल्यास साखर गुळाचे प्रमाण एकास सव्वा किंवा दीड वाटी घ्यावे. पूर्ण साखर अथवा गुळाची पण पुरणपोळी करतात. साखर गुळ याचे प्रमाणही आवडीप्रमाणे कमी जास्त घ्यावे.

Monday, December 08, 2008

उडीद वडा





जिन्नस :


२ वाट्या उडीद डाळ
२-३ मिरच्या
५-६ लसूण पाकळ्या
थोडी कोथिंबीर
मीठ

क्रमवार मार्गदर्शन :

उडीद डाळ पाण्यामध्ये ७-८ तास भिजवा. नंतर त्यातले पाणी काढून टाका व ही डाळ मिक्सर/ग्राईंडर वर बारीक दळून घ्या. वाटताना जरूरीपुरते पाणी घाला. नंतर त्यात लसूण मिरची यांचे खूप बारीक तुकडे घाला. बारीक चिरलेली कोथंबीर घालून चवीपुरते मीठ घाला. कढईत पूरेसे तेल घालून तापवा व वडे तळा. वडे तळून ते पेपर टॉवेल वर ठेवा म्हणजे त्यातले तेल निथळून जाईल. सांबार चटणीसोबत हे वडे छान लागतात. वडे घालताना हातावरच पीठाला थोडा पसरट आकार द्या व अलगद तेलात सोडा.


Tuesday, November 25, 2008

बदाम बर्फी



जिन्नस :


बदाम २ वाट्या
दूध थोडेसे
साखर २ वाट्या
साजूक तूप २ चमचे


क्रमवार मार्गदर्शन :


बदाम गरम पाण्यात भिजत घाला. दोन तासानंतर त्याची साले सोला. हे खूप किचकट काम आहे. नंतर बदाम, साखर व थोडे दूध घालून मिक्सर/ब्लेंडर वर त्याची खूप बारीक पेस्ट करा. बदाम बारीक होऊन एकजीव होण्याइतकेच दूध घालावे. नंतर मध्यम आचेवर कढई ठेवून त्यात २ चमचे तूप घाला व बदामाची बारीक केलेली पेस्ट घालून मिश्रण कालथ्याने ढवळावे. आता थोडी आच वाढवावी. एकसारखे ढवळत राहावे. काही वेळाने मिश्रण आटायला लागेल व त्याचा गोळा बनायला लागेल. याचवेळी गॅस बंद करा. मिश्रण खाली उतरवा व बराच वेळ कालथ्याने घोटा. काही वेळाने गोळा अजून थोडा घट्ट होईल. एका थाळीला तूपाचा हात लावा व हे मिश्रण त्यावर ओता. सर्व बाजूने एकसारखे थापा. थापताना प्लॅस्टीकचा तूपाचा हात लावलेला पसरट कागद वापरा. मिश्रण गार झाले की वड्या कापा.

Tuesday, November 18, 2008

सुरळीची वडी




जिन्नस:

हरबरा डाळीचे पीठ १ वाटी
पाऊण वाटी आंबट ताक,
सव्वा वाटी पाणी
१ चमचा मैदा
बारीक चिरलेल्या हिरव्या मिरच्या (कमी तिखट असलेल्या)
बारीक चिरलेली कोथिंबीर
नारळाचा खव
किंचित लाल तिखट व हळद, चवीपुरते मीठ
किंचित साखर
फोडणीसाठी तेल, मोहरी, हिंग, हळद



मार्गदर्शन:



वाटीभर तेलाची फोडणी करून घ्या. बारीक चिरलेल्या मिरच्या , कोथिंबीर आणि नारळाचा खव 3-4 वाट्या करा. त्यात चवीपुरते थोडे मीठ व थोडी साखर घाला.



डाळीचे पीठ, आंबट ताक, मैदा व पाणी एकत्र करून हाताने कालवावे. त्यात अगदी थोडे तिखट, हळद व चवीपुरते मीठ घाला. पीठ कालवताना पीठाच्या छोट्या गुठळ्या होतात त्या हाताने पूर्णपणे मोडून काढा. नंतर हे एकसंध झालेले मिश्रण एका कढईत घालून गॅसवर मध्यम आचेवर ठेवा. कालथ्याने हे मिश्रण सतत ढवळावे लागते. काही वेळाने हे मिश्रण शिजेल. शिजल्यावर त्यावर एक झाकण ठेवा व आच मंद करा. २-३ मिनिटांनी झाकण काढून परत सर्व मिश्रण एकसारखे करा. आता हे मिश्रण पूर्णपणे शिजलेले असेल. गॅस मंद ठेवा.



2 मध्यम आकाराची स्टीलची ताटे उपडी करा व त्यावर प्रत्येकी थोडे मिश्रण घाला. एकावेळी एका ताटावर थोडेसे मिश्रण घालून त्यावर थोडे तेल लावलेला प्लॅस्टीकचा पसरट कागद ठेवून अगदी हलक्या हाताने लाटण्याने लाटा. सर्वबाजूने एकसारखे पातळ लाटा. याप्रमाणे 2 - 3 ताटे करून घ्या. मिश्रण गरम असतानाच लाटले जाते म्हणून एका वेळी एक ताट. तोवर बाकीचे मिश्रण कढईतच ठेवा मंद आच करून.


आता सुरीने उभे कापून वड्या पाडाव्या. नंतर त्यावर मिरच्या कोथिंबीर व नारळाचा खव सर्व बाजूने घाला. शिवाय तयार केलेली फोडणीही घाला. प्रत्येक पट्टी अलगद हाताने गुंडाळी करून एक गोल वळकटी करा. वळकटीसारख्या गोल केलेल्या वड्या म्हणजेच सुरळीच्या वड्या.

त्यावर परत थोडी फोडणी व खवलेल्या ओल्या  नारळाचे  तयार केलेले सारणही घाला. 


Monday, November 10, 2008

आले वडी

जिन्नस :
किसलेले आले २ वाट्या
साखर २ वाट्या
ricotta cheese (fat 9g) 1 वाटी अथवा  1 वाटी किसलेला खवा
साजूक तूप  पातळ करुन  2 चमचे 
 
क्रमवार मार्गदर्शन:
एका पातेल्यात साखर व किसलेले आले एकत्र एकसारखे करून घ्या. नंतर मध्यम आचेवर कढई ठेवा. ती तापली की त्यात थोडे साजूक तूप घाला व एकत्रित केलेले आले व साखर यांचे मिश्रणही घाला. हळूहळू साखर वितळायला लागेल. आता आच थोडी वाढवा. काही वेळाने साखर वितळून हे मिश्रण उकळायला लागेल. आता खवा अथवा रिकोटा चीझ घालुन एकसारखे सारखे ढवळत रहा.
 
 
 
काही वेळाने हे सर्व मिश्रण शिजून कोरडे पडायला लागेल व गोळा बनायला लागेल. अधूनमधून कालथ्याने ढवळत रहा. थोड्यावेळाने गॅस बंद करून हे मिश्रण थोडे कालथ्याने घोटून घ्या व नंतर लगेच एका ताटलीत काढा. या ताटलीला आधी थोडा तूपाचा हात लावून घ्यावा. ताटलीत मिश्रण ओतल्या ओतल्या त्यावर तूपाचा हात लावलेला एक पसरट प्लॅस्टीकचा कागद ठेवून सर्वबाजूने एकसारखे थापून घ्या. नंतर गरम असतानाच कालथ्याने वड्या कापा. हे मिश्रण खूप गार झाले की वड्या काढून डब्यात ठेवा.