कोबीची भाजी

 जिन्नस :

कोबी ४ ते ५ वाट्या (उभा आणि बारीक चिरा)
बटाटा १ (साले काढू नका, काचऱ्यांना चिरतो तसा पातळ चिरा)
टोमॅटोच्या फोडी ४ ते ५
लाल तिखट १ चमचा
धनेजीरे पूड १ चमचा
मीठ चवीपुरते
चिमूट भर साखर
हिरव्या मिरच्या २ (जाड तुकडे करा)
कढीपत्ता ५-६ पाने
फोडणीकरता तेल, मोहरी, जिरे, हिंग व हळद

क्रमवार मार्गदर्शन :

चिरलेला कोबी पाण्याने धुवून एका रोळीत पाणी निथळण्याकरता ठेवा. मध्यम आचेवर कढई तापत ठेवा. त्यात जरूरीपुरते तेल घाला. तेल तापले की त्यात मोहरी, जिरे, हिंग व हळद घालून फोडणी करा. नंतर त्यात मिरच्यांचे तुकडे, कढीपत्ता, बटाटा व टोमॅटो घाला व कालथ्याने परतून घ्या. नंतर त्यात चिरलेला कोबी घाला व परत सर्व मिश्रण चांगले परतून घ्या. आता गॅस बारीक करा व कढईवर झाकण ठेवा. मंद आचेवर भाजी शिजवा. काही मिनिटांनी झाकण काढा व भाजी परता. परत एकदा वाफ द्या. भाजी शिजली की त्यात लाल तिखट, धनेजिरे पूड, मीठ व साखर घालून भाजी सर्व बाजूने ढवळा व झाकण ठेवून एक वाफ द्या. ही भाजी खूप चविष्ट लागते. पोळी भाताबरोबर खा.

 

 

दह्यातला दुधी

जिन्नस :

दुधी भोपळ्याच्या फोडी २ ते ३ वाट्या
टोमॅटो बारीक चिरलेला अर्धा मोठा
कांदा बारीक चिरलेला पाव
लसूण पाकळ्या ३ ते ४ (बारीक चिरलेल्या)
आलं बारीक तुकडा (बारीक चिरलेले
ओल्या नारळाचा खव अर्धी वाटी
दाण्याचे कूट अर्धी वाटी
चिरलेली कोथिंबीर अर्धी वाटी
दही ३ ते ४ चमचे (पाणी घालून पातळ करा)
१ ते २ चमचे डाळीचे पीठ (पातळ केलेल्या दह्यामध्ये कालवून घ्या)
हिरवी मिरचीचे तुकडे ३ ते ४
फोडणीसाठी तेल (नेहमीपेक्षा थोडे जास्त)
फोडणीसाठी मोहरी, जिरे,हिंग, हळद,
लाल तिखट १ चमचा
धनेजिरे पूड १ चमचा
साखर २ चमचे
मीठ चवीपुरते
कढीपत्ता ४ ते ५ पाने

क्रमवार मार्गदर्शन : पातेल्यात फोडणीसाठी तेल टाकून ते गॅसवर ठेवा. आच मध्यम हवी. तेल पुरेसे तापले की त्यात मोहरी, जिरे, हिंग, हळद घालून फोडणी करा.

नंतर त्यात लगेच  चिरलेले आलं, लसूण, हिरव्या मिरच्यांचे तुकडे व कढीपत्ता घाला. नंतर लगेच बारीक चिरलेला कांदा, व टोमॅटो घाला व हे सर्व मिश्रण डावेने परतून घ्या. नंतर लगेचच दुधी भोपळ्याच्या फोडी घाला व परत एकसारखे ढवळून घ्या. आता झाकण ठेवा.

आच थोडी वाढवा. तेलाच्या फोडणीमध्ये घातलेले जिन्नस तेलामध्येच चांगले शिजू देत. आता झाकण काढून त्यात
अगदी थोडे  पाणी घाला.


परत पातेल्यावर झाकण ठेवा. काही सेकंदाने झाकण काढून दुधी भोपळ्याच्या फोडी नीट शिजल्या आहेत की नाही ते बघावे. त्या शिजल्या असतील तर त्यात लाल तिखट, धनेजिरे पूड, मीठ व साखर घालून ढवळावे. थोडे पाणी घालून त्यात चिरलेली कोथिंबीर, दाण्याचे कूट व नारळाचा खवही घालावा. नंतर हे सर्व मिश्रण एकसारखे करून परत झाकण ठेवून शिजवावे. झाकण काढून त्यात पातळ केलेले दही आणि त्यात कालवलेले हरबरा डाळीचे पीठ हे मिश्रण घालावे. एकसारखे नीट ढवळून घ्यावे. आणि आता फक अजून एक वाफ द्यावी. आता गॅस बंद करा.

अशी ही तयार झालेली गरमागरम भाजी चवीला खूपच छान आणि चविष्ट लागते. ही भाजी स्वनिर्मित आहे. दूधीच्या दोन भाज्या आधीच लिहिल्या आहेत. एक दुधातली आणि दुसरी मुगाची डाळ घालून केलेली. आता परत काहीतरी वेगळेपणा आणण्यासाठी भाजी करून पाहिली.

भेंडीची रसाची भाजी

जिन्नस :


भेंडीच्या गोल आकाराच्या मध्यम चकत्या २ ते ३ वाट्या
चिंचेचा दाट रस अर्धी वाटी
दाण्याचे कूट अर्धी वाटी
गूळ ३ ते ४ चमचे
लाल तिखट १ चमचा
धनेजिरे पूड १ चमचा
मीठ चवीनुसार
मिरच्यांचे तुकडे ३ ते ४
कडीपत्याची पाने ५ ते ६
चिरलेली कोथिंबीर अर्धी वाटी
फोडणी करता तेल पाव वाटी (तेल जास्त घेतल्याने भेंडीला तार सूटत नाही)
मोहरी,  जिरे, हिंग, हळद

क्रमवार मार्गदर्शन : कढईत तेल घाला व गॅस वर ठेवा. तेल तापले की त्यात मोहरी, हिंग, जिरे, हळद घाला. नंतर त्यात चिरलेल्या मिरच्या व कडिपत्त्याची पाने घाला. नंतर त्यात चिरलेली भेंडी घालून परतून घ्या. आता कढईवर झाकण ठेवा. १० मिनिटांनी झाकण काढून भाजी परत एकदा नीट परतून घ्या. ही भाजी व्यवस्थित शिजली की मग त्यात चिंचेचे पाणी, तिखट, धनेजिरे पूड, मीठ, गूळ, दाण्याच कूट घाला. शिवाय चिरलेली कोथिंबीर घाला. व परत एकदा नीट परतून घ्या. आता परत झाकण ठेवा व काही सेकंदाने काढून परता. आता या मध्ये जरूरीनुसार पाणी घाला व ढवळा. परत एकदा वाफ द्या. गॅस बंद करा. ही पळीवाढी रसाची भाजी चवीला छान लागते. पोळी भाकरी बरोबर खायला द्या.

पडवळाची भाजी

जिन्नस :

पडवळ १ मोठे
कांदा थोडासा बारीक चिरलेला
लसूण १ पाकळी बारीक चिरलेली
मिरच्यांचे तुकडे ४ ते ५, कडिपत्ता
१ छोटा टोमॅटो (चिरलेला)
नारळाचा खव मूठभर
चिरलेली कोथिंबीर मूठभर

हरभराडाळ मूठभर
फोडणीसाठी तेल, मोहरी, हिंग, हळद
लाल तिखट अर्धा चमचा
धनेजिरे पावडर अर्धा चमचा
२ ते ३ चमचे चिरलेला गूळ
चवीनुसार मीठ

क्रमवार मार्गदर्शन : पडवळाची साले काढा व त्याच्या बारीक काचऱ्यासारख्या फोडी करून ही चिरलेली भाजी धुवून घ्या. नंतर एका पातेल्यात जरूरीपुरते तेल घाला. ते तापले की त्यात मोहरी हिंग व हळद घालून फोडणी करा. नंतर त्यात मिरच्यांचे तुकडे,लसूण, कडिपत्ता, कांदा व टोमटो घालून हे मिश्रण थोडे परतून घ्या. नंतर त्यात पाण्यात ४ ते ५ तास भिजलेली हरबरा डाळ घालून परता. नंतर त्यात अगदी थोडे पाणी घालून डाळ शिजवा. नंतर त्यात चिरलेल्या पडवळाच्या फोडी घाला व परतून घ्या. व ही भाजी अगदी थोडे पाणी घालून वाफेवर शिजवून घ्या. शिजल्यावर त्यात लाल तिखट, धनेजिरे पूड, गूळ, मीठ, चिरलेली कोथिंबीर व नारळाचा खव घाला व अजून थोडे जास्त परतून घ्या.

  

आता परत थोडे पाणी घालून  शिजवा. शिजवताना पातेल्यावर झाकण ठेवा. झाकण ठेवले असता भाजी पटकन शिजायला मदत होते.
गॅस बंद करा. ही भाही पोळी किंवा भाताबरोबर खावयास द्या.

 

 

दुधी भोपळ्याची भाजी

 

 

 

जिन्नस :

 

दुधी भोपळ्याच्या फोडी ५ ते ६ वाट्या
मुगाची डाळ मूठभर (डाळ पाण्यात एक  ते २ तास भिजवावी)
हिरव्या मिरच्यांचे तुकडे ४ ते ५
लाल तिखट पाऊण चमचा
धनेजिरे पावडर पाऊण चमचा
कडिपत्ता ५ ते ६ पाने
चवीपुरते मीठ
गूळ मूठभर
कोथिंबीर २ ते ३ चमचे
ओल्या नारळाचा खव मूठभर 
दाण्याचे कूट मूठभर
फोडणीसाठी तेल
मोहरी, हिंग, जिरे, हळद


क्रमवार मार्गदर्शन :  पातेल्यात  जरूरीपुरते तेल घालून ते तापले की त्यात मोहरी, जिरे,  हिंग, हळद घालून फोडणी करा. त्यात मिरच्यांचे तुकडे, कडिपत्ता घाला व थोडे परतून घ्या. नंतर त्यात भिजवलेली मुगडाळ घाला व परतून घ्या. झाकण ठेवा व काही सेकंदाने
झाकण काढा व परत ढवळा. नंतर त्यात दुधी भोपळ्याच्या फोडी घालून परतून घ्या. मग परत एकदा झाकण ठेवा व एक चांगली वाफ द्या. नंतर झाकण काढून परत भाजी ढवळा. नंतर त्यात थोडे थोडे पाणी घालून वाफेवर ही भाजी चांगली शिजवून घ्या. नंतर त्यात लाल तिखट, धनेजिरे पूड, गूळ, मीठ घाला व ढवळा.  परत थोडे पाणी घालून एक वाफ द्या. झाकण काढा. आता त्यात दाण्याचे कूट, कोथिंबीर, ओला नारळ घाला व भाजी परत एकदा नीट ढवळून घ्या. आता थोडे पाणी घालून एक दणदणीत वाफ येऊ देत.

झाकण काढा. भाजी तयार झालेली आहे. पोळी किंवा भाताबरोबर ही भाजी चांगली लागते.

मसाला वांगी

जिन्नस :

बारीक चिरलेली वांगी ३ वाट्या
मध्यम चिरलेला कांदा पाऊण वाटी
मध्यम चिरलेला टोमॅटो पाऊण वाटी
पाउण चमचा लाल तिखट
पाऊण चमचा धनेजिरे पूड
पाऊण चमचा गरम मसाला
चवीपुरते मीठ
फोडणीकरता तेल, मोहरी, हिंग, जिरे, हळद
दाण्याचे कूट मूठभर
सजावटीसाठी कोथिंबीर
अर्धा चमचा साखर



मार्गदर्शन : मध्यम आचेवर कढई तापत ठेवा. ती तापली की त्यात नेहमीपेक्षा थोडे जास्त तेल घाला.  ते तापले की त्यात मोहरी, जिरे, हिंग, हळद घालून फोडणी करा. नंतर त्यात चिरलेले वांगी, टोमॅटो व कांदा घाला व भाजी ढवळा. आता कढईवर झाकण ठेवा. काही सेकंदाने झाकण काढून परत एकदा भाजी ढवळा. आता अगदी जरूरीपुरतेच थोडेसेच पाणी घाला व परत झाकण ठेवा. एक दणदणीत वाफ येऊ देत म्हणजे वांगी चांगली शिजतील. आता त्यात लाल तिखट, धनेजिरे पूड, गरम मसाला, मीठ  व दाण्याचे कूट घाला. परत एकदा भाजी ढवळून घ्या. तेल कमी वाटले तर परत घाला. नंतर परत काही सेकंदाची वाफ द्या. आता अर्धा चमचा साखर पेरून भाजी ढवळा. भाजी बाऊलमध्ये काढून त्यावर कोथिंबीर पेरा. ही भाजी खूप चविष्ट लागते. या भाजीवर तेलाचा चांगला तवंग आला पाहिजे हे विषेश आहे. तरच ही भाजी चांगली लागते.

पालक- मूगडाळ

जिन्नस :
चिरलेला पालक ४ मुठी
एक मध्यम बटाटा
अर्धा कांदा
अर्धा टोमॅटो
२ लसूण पाकळ्या
लाल तिखट पाऊण चमचा
धनेजिरे पूड पाऊण चमचा
चवीनुसार मीठ
मूगडाळ अर्धी वाटी
फोडणी साठी तेल
मोहरी, हिंग. हळद


मार्गदर्शन : चिरलेला पालक पाण्याने धुवून रोळीमध्ये निथळत ठेवा. पाणी सर्व निघून गेले पाहिजे. मुगाची डाळ २ तास भिजत घाला. २ तासानंतर भाजी करायला घ्या. मध्यम आचेवर कढई तापत ठेवा. ती तापली की त्यात फोडणीसाठी पुरेसे तेल घाला. ते तापले की त्यात मोहरी, हिंग , हळद घालून फोडणी करा. त्यात आधी मुगाची डाळ घालून परता व त्याला थोडी वाफ द्या. नंतर त्यात चिरलेली मिरची, लसूण, कांदा, घालून थोडे परता. नंतर त्यात चिरलेला बटाटा, टोमॅटो घालून थोडे परता. आता या मिश्रणावर झाकण ठेवा. काही सेकंदाने झाकण काढा व परत मिश्रण नीट परता. आता त्यात चिरलेला पालक घाला व परता. झाकण ठेवा व एक दणदणीत वाफ द्या. परत झाकण काढून त्यात लाल तिखट, धनेजिरे पूड व चवीपुरते मीठ घालून नीट ढवळा. अजून एक वाफ द्यावी. नंतर परतून भाजी सर्व बाजूने एकसारखी करून घ्यावी. पोळी बरोबर खायला द्या. ही भाजी चवीला खूप छान लागते.

घेवड्याची भाजी

जिन्नस :

घेवड्याच्या शेंगा सोललेल्या (३ते ४ वाट्या)
१ बटाटा उकडून त्याच्या फोडी
लाल तिखट अर्धा चमचा
धनेजिरे पूड अर्धा चमचा
गरम मसाला अर्धा चमचा
दाण्याचे कूट २ मूठी
नारळाचा खव १ मूठ
थोडा गूळ
चवीपुरते मीठ
फोडणीसाठी तेल
मोहरी, हिंग, हळद



मार्गदर्शन : घेवड्याच्या शेंगा कूकरमध्ये शिजवून घ्या. कूकर गार झाला की शिजलेल्या शेंगा बाहेर काढा. शिजताना त्यात थोडे पाणी घाला. शिजल्यावर यातले पाणी एका वाटीत काढा. मध्यम आचेवर पातेले तापत ठेवा. ते तापले की त्यात पुरेसे तेल घाला. ते तापले की त्यात मोहरी हिंग हळद घालून फोडणी करा. नंतर त्यामध्ये घेवड्याच्या शिजलेल्या शेंगा आणि उकडलेल्या बटाट्याच्या फोडी घाला आणि ढवळा. नंतर त्यात लाल तिखट, धनेजिरे पूड, गरम मसाला, मीठ, गूळ, दाण्याचे कूट, नारळाचा खव घाला. परत एकदा भाजी नीट ढवळून घ्या. नंतर शिजवलेल्या घेवड्याच्या शेंगातले पाणी काढून ठेवलेले घाला. नंतर त्यावर झाकण ठेवा. ५ मिनिटे भाजी शिजू दे. थोड्यावेळाने गॅस बंद करा. पोळीपेक्षाही ही भाजी भाताबरोबर छान लागते.

मेथीची भाजी

जिन्नस :

मेथीची मोठी १ जुडी
लाल तिखट पाव चमचा
धनेजिरे पूड पाव चमचा
चवीपुरते मीठ
२ते ३ चमचे डाळीचे पीठ
२ते ३ चमचे चिरलेला कांदा
लसूण पाकळ्या चिरलेल्या २
१ ते २ मिरचीचे लहान तुकडे
फोडणीकरता तेल
मोहरी, हिंग, हळद



मार्गदर्शन : मेथी निवडून धुवून घ्या. कूकरमध्ये शिजवून घ्या. कूकर गार झाला की त्यातली शिजलेली मेथी बाहेर काढा व त्यात डाळीचे पीठ मिक्स करा. मिक्स करताना त्यात गुठळी होऊन देवू नका. नंतर त्यात लाल तिखट, धनेजिरे पूड, मीठ घालून डावेने भाजी एकसारखी करून घ्या. मध्यम आचेवर पातेले तापत ठेवा. ते तापले की त्यात तेल घाला. नेहमी फोडणी करतो त्यापेक्षा जरा जास्त तेल घालावे. तेल तापले की त्यात मोहरी, हिंग, हळद घालून फोडणी करा. फोडणीमध्ये चिरलेली मिरची, लसूण व कांदा घाला. कांदा लसूण बारीक चिरा. आच कमी करून हे सर्व जिन्नस थोडे परतून घ्या. नंतर त्यात मेथीचे तयार केलेले मिश्रण घाला. व थोडे पाणी घाला. भाजी ढवळा. एकसारखी करा. नंतर त्यावर झाकण ठेवा. काही सेकंदाने झाकण काढा. गॅस बंद करा. मेथीची भाजी तयार झाली आहे. कांदा लसूण फोडणीत घातल्याने एक छान चव येते. पोळीपेक्षाही ही भाजी गरम भाकरीशी जास्त छान लागते.

या भाजीला मेथीची गोळा भाजी म्हणतात.

लाल भोपळ्याची भाजी

जिन्नस :

लाल भोपळ्याच्या मध्यम आकाराच्या फोडी ३ ते ४ वाट्या (पाण्याने धुवून निथळून घ्या)
दाण्याचे कूट २ मुठी
खवलेला ओला नारळ १ मूठ
चिरलेली कोथिंबीर २ ते ३ चमचे
लाल तिखट १ चमचा
मेथी दाणे पाव चमचा
मीठ
गूळ ३ ते ४ चमचे चिरलेला
मोहरी, जिरे,हिंग, हळद

मार्गदर्शन : मध्यम आचेवर पातेले तापत ठेवा. ते तापले की त्यात तेल घाला. ते तापले की त्यात मोहरी, हिंग,जिरे, मेथीचे दाणे, व हळद घालून फोडणी करा. फोडणीत अर्धा चमचा तिखट घाला. नंतर त्यात भोपळ्याच्या फोडी घालून डावेने ढवळून घ्या. नंतर अगदी थोडे पाणी घाला व एक वाफ द्या. नंतर त्यात अर्धा चमचा लाल तिखट, मीठ, गूळ घाला व परत एकदा भाजी ढवळून घ्या. नंतर त्यात पाणी घालून वाफेवर शिजवा. नंतर त्यात दाण्याचे कूट, खवलेला ओला नारळ, गूळ व बारीक चिरलेली कोथिंबीर घाला. परत थोडे पाणी घालून भाजी नीट ढवळा. ही भाजी पटकन शिजते. फोडी लगदा होईपर्यंत शिजवू नका. फोडी पूर्ण राहिल्या पाहिजेत. रस अजून हवा असल्यास अजून थोडे पाणी घाला.


लाल तिखट, मेथीचे दाणे व पुरेसा गूळ या मिश्रणाने ही भाजी चविष्ट लागते.

मसालेदार बटाटे

जिन्नस :

बटाटे ४ (साले काढा)
लसूण १ पाकळी
आले छोटा तुकडा
कांदा थोडा
लाल तिखट अर्धा चमचा
धनेजिरे पूड अर्धा चमचा
गरम मसाला अर्धा चमचा
मिरपूड पाव चमचा
साखर १ चमचा
मीठ
दाण्याचे कूट १ ते २ मूठी
दही ५ ते ६ चमचे
हरबरा डाळीचे पीठ २ चमचे
तेल
मोहरी,जिरे, हिंग, हळद
चिरलेली कोथिंबीर थोडी

क्रमवार मार्गदर्शन : बटाटे मध्यम आकारामध्ये चिरा. मध्यम आचेवर पातेले तापत ठेवा. ते तापले की त्यात फोडणीकरता तेल घाला. ते तापले की त्यात मोहरी जिरे हिंग हळद घालून फोडणी करा. नंतर त्यामध्ये बारीक चिरलेली लसूण, आले व कांदा घाला व थोडे परतून घ्या. नंतर त्यात चिरलेले बटाटे घाला व परत थोडे परतून घ्या. नंतर त्यात थोडे पाणी घालून पातेल्यावर झाकण ठेवा.


आता दह्यामध्ये डाळीचे पीठ, लाल तिखट, धनेजिरे पूड, गरम मसाला, मिरपूड, मीठ घाला व थोडे पाणी घालून नीट एकसारखे करून घ्या. पातेल्यातले बटाटे अजून नीट शिजण्याकरता परत त्यात थोडे थोडे पाणी घालून शिजवून घ्या. बटाट्यामध्ये पाणी घातले की त्यावर झाकण ठेवून ४-५ सेकंद ठेवत जा म्हणजे बटाटे चांगले शिजतील. आता मसाल्याचे केलेले दही घालून नीट ढवळा. परत झाकण ठेवा. आच मध्यम आचेवर असू दे. नंतर त्यात दाण्याचे कूट व चिरलेली कोथिंबीर घाला. मिश्रण एकत्र शिजल्यावर परत वरून थोडे परत लाल तिखट, धनेजिरे पूड, गरम मसाला व मीरपूड घाला. १ चमचा साखर घाला. परत एकदा नीट ढवळा. मिश्रण अजून थोडे पातळ हवे असेल तर पाणी घालून मिश्रण अजून थोडे उकळू द्या. आता गॅस बंद करा. थोड्यावेळाने मसालेदार बटाटा काचेच्या बाऊलमध्ये घालून त्यावर चिरलेली कोथिंबीर घालून सजवा.

रस्सा

जिन्नस :

एक मोठा बटाटा (साले काढावीत. )
अर्धा कांदा
दीड लाल टोमॅटो
अर्धा चमचा लाल तिखट
अर्धा चमचा धनेजिरे पूड
अर्धा चमचा गरम मसाला
४-५ चमचे दाण्याचे कूट
४-५ चमचे ओल्या नारळाचा खव
चवीपुरते मीठ
पाव चमचा साखर
तेल फोडणीसाठी
मोहरी, जिरे, हिंग, हळद



मार्गदर्शन : बटाटा, कांदा, टोमॅटो या सर्वाच्या मध्यम आकाराच्या फोडी करा. मध्यम आचेवर छोटा कूकर तापत ठेवा. तो तापला की त्यात तेल घाला. ते तापले की त्यात मोहरी, जिरे, हिंग व हळद घालून फोडणी करा. नंतर त्यात बटाटा कांदा व टोमॅटोच्या केलेल्या फोडी घाला. हे मिश्रण एकदा ढवळून घ्या. नंतर त्यामध्ये लाल तिखट, धनेजिरे पूड, गरम मसाला, मीठ, साखर, दाण्याचे कूट, व ओला नारळ घालून परत हे मिश्रण डावेने नीट ढवळून घ्या. नंतर त्यामध्ये  एक वाटी पाणी घाला. परत एकदा डावेने ढवळून घ्या. कूकरचे झाकण लावा. व एक शिट्टी करा. झटपट रस्सा तयार झाला आहे. गॅस बंद करा.

दुधी भोपळा

जिन्नस :

मध्यम आकाराचा दुधी भोपळा
पाव वाटी मुगाची डाळ
लाल तिखट अर्धा चमचा
धनेजिरे पूड अर्धा चमचा
हिरवी मिरची चिरलेली २
दाण्याचे कूट मूठभर
ओल्या नारळाचा खव मूठभर
चवीपुरते मीठ
साखर १ ते २ चमचे
दूध अर्धा ते १ कप
फोडणीसाठी तेल
मोहरी, हिंग, हळद



मार्गदर्शन :  भाजी करण्याच्या आधी थोडावेळ मुगाची डाळ पाण्यात भिजत घाला. दूधी भोपळ्याच्या मध्यम आकाराच्या फोडी करून घ्या. मध्यम आचेवर पातेले तापत ठेवा. ते पुरेसे तापले की त्यात फोडणीसाठी तेल घाला. ते तापले की त्यात मोहरी, हिंग, हळद घालून फोडणी करा व लगेचच त्यामध्ये चिरलेल्या मिरच्या व मुगाची डाळ घालून थोडे परतून घ्या. आता दुधीभोपळ्याच्या फोडी घालून ढवळा. त्यावर झाकण ठेवा. काही सेकंदांने झाकण काढा व त्यात अगदी थोडे पाणी घाला. असे अगदी थोडे थोडे पाणी घालून भाजी शिजवून घ्या. नंतर त्यात लाल तिखट, धनेजिरे पूड, मीठ व साखर घाला. भाजी ढवळून घ्या. नंतर त्यात दाण्याचे कूट व नारळाचा खव घाला. व गार दूध घाला. दूध तापवून मग ते गार झाल्यावर घाला. आता परत झाकण ठेवा व थोड्यावेळ भाजी शिजू दे. थोड्यावेळाने झाकण काढा. आता ही भाजी चांगली मिळून मिसळून आलेली असेल. दाटपणाही आला असेल. दुध घातल्याने एक वेगळी चव येते. ही भाजी पोळीपेक्षाही गरम भाताबरोबर जास्त चांगली लागते.

दोडका

जिन्नस :
२ मोठाले दोडके
अर्धी वाटी हरबरा डाळ
लाल तिखट अर्धा चमचा
धनेजिरे पूड अर्धा चमचा
अगदी थोडा गूळ
चवीपुरते मीठ
नारळाचा  खव मूठभर
दाण्याचे कूट मूठभर
तेल
मोहरी, हिंग, हळद




मार्गदर्शन : दोडक्याची साले काढून त्याच्या मध्यम आकाराच्या फोडी करा. हरबऱ्याची डाळ भिजत घाला. डाळ अर्धा तास भिजू दे. मधम आचेवर पातेले तापत ठेवा. ते पुरेसे तापले की त्यात तेल घाला. तेल तापले की त्यात मोहरी हिंग हळद घालून फोडणी करा. दोडक्याच्या फोडी धुवून घ्या व नंतर त्या फोडणीत घाला. नंतर त्यात भिजलेली हरबरा डाळ घालून भाजी ढवळा व त्यावर झाकण ठेवा. झाकण ठेवले की भाजी शिजायला मदत होते. काही सेकंदाने झाकण काढून त्यात थोडे पाणी घाला व भाजी शिजवा. भाजी शिजत आली की त्यात लाल तिखट, धनेजिरे पूड, चवीपुरते मीठ घाला. नंतर थोडा गूळ, नारळाचा खव व दाण्याचे कूट घाला व भाजी एकसारखी ढवळून घ्या. परत थोडे झाकण ठेवा व भाजी शिजवा. काही सेकंदाने झाकण काढा. आता ही भाजी मिळून आली असेल व थोडी दाट दिसेल. गॅस बंद करा.

शेपू (Dill)

जिन्नस :
शेपूच्या जुड्या २
पाव कांदा
१ टोमॅटो
अर्धी वाटी मुगाची डाळ
१ मिरची
२ ते ३ लसूण पाकळ्या
लाल तिखट पाव चमचा
धने जिरे पूड पाव चमचा
मीठ
तेल
मोहरी, हिंग, हळद


मार्गदर्शन :मुगाची डाळ पाण्यामध्ये भिजत घाला. शेपू बारीक चिरून धुवून घ्या. धुवून घेतलेला शेपू चाळणीमध्ये ठेवा म्हणजे सर्व पाणी निथळून जाईल. कांदा, टोमॅटो, लसूण, मिरची चिरून घ्या. मध्यम आचेवर कढई तापत ठेवा. ती पुरेशी तापली की त्यात तेल घाला. ते तापले की त्यात मोहरी हिंग हळद घालून फोडणी करा. नंतर त्यात भिजलेली मुगाची डाळ घालून थोडे परता. नंतर त्यात चिरलेले लसूण कांदा मिरची व टोमॅटो घालून थोडे परतून घ्या. नंतर त्यात चिरलेला शेपू घाला व थोडे परता व ढवळून घ्या. नंतर झाकण ठेवा व वाफेवर भाजी शिजवून घ्या. ती नीट शिजली की त्यात लाल तिखट, धनेजिरे पूड व मीठ घाला व भाजी सर्व बाजूने नीट ढवळा म्हणजे तिखट मीठ सर्व भाजीला एकसारखे लागेल. नंतर परत झाकण ठेवून भाजीला परत एक वाफ द्या. गॅस बंद करा. ही तयार झाली डाळ शेपूची भाजी तयार. ही भाजी पीठ पेरून पण छान लागते. भाकरीबरोबर ही भाजी खायला द्या.

Fajita

जिन्नस :
चिरलेला पालक २ मूठ (पालकाची कोरडी पाने चिरा, ओली नकोत )
एक मोठी सिमला मिरची
एक मध्यम बटाटा
एक लाल टोमॅटो
अर्धा कांदा
एक हिरवी मिरची
फोडणीसाठी तेल
मोहरी हिंग, हळद
लाल तिखट
धनेजिरे पूड
मीठ
किंचित साखर



मार्गदर्शन : सिमला मिरची, बटाटा, कांदा, टोमॅटो, मिरची चिरून घ्या. मध्यम आचेवर कढई तापत ठेवा. ती पुरेशी तापली कि त्यात तेल घाला. तेल पुरेसे तापले की त्यात मोहरी हिंग हळद घालून फोडणी करा व त्यात चिरलेली हिरवी मिरची, सिमला मिरची, कांदा, बटाटा,  टोमॅटो घालून परतावे. नंतर एक वाफ द्यावी. नंतर त्यात चिरलेला पालक घालून परतावे. मिश्रण परतत राहावे. नंतर परत एकदा वाफेवर भाजी शिजवून त्यात लाल तिखट, धनेजिरे पूड अगदी थोडे चवीपुरते घाला. मीठ चवीपुरते व किंचिती साखर घालून परत ही भाजी परता. आता गॅस थोडा मोठा करून भाजी परतत रहा. ही भाजी थोडी कच्ची ठेवली तर जास्त चांगली लागते. वाफेवर भाजी शिजवताता थोडे पाणी राहील तेही परतून पाणी घालवून टाका. किंवा झाकण ठेवून वाफेवर शिजवली नाही तर सतत शिजेपर्यंत परतत रहा. यात मसाले अगदी चवीपुरते घालायचे आहेत. मूळ भाजीची चव तशीच रहायला हवी. ही मूळ मेक्सिकन पाककृती आहे पण मी इंडियन स्टाईलने केली आहे. गरम गरम ही भाजी जास्त चांगली लागते. पोळीबरोबर भाजी खा.

अरूगुला

जिन्नस:

अरूगुला १ पॅकेट
पाव कांदा
३-४ लसूण पाकळ्या
लाल तिखट अर्धा चमचा
धनेजिरे पूड अर्धा चमचा
मीठ चवीपुरते
तेल, मोहरी, हिंग, हळद

मार्गदर्शन : अरुगुला चिरून धुवून घ्या. रोळीमध्ये चिरलेला अरूगुला घालून त्याखाली ताटली ठेवा म्हणजे त्यातले पाणी निथळून जाईल. मध्यम आचेवर कढई तापत ठेवा. ती पुरेशी तापली की त्यात फोडणीकरता थोडे तेल घालून त्यात मोहरी, हिंग व हळद घाला. नंतर त्यामध्ये चिरलेला कांदा व चिरलेल्या लसूण पाकळ्या घाला. कांदा व लसूण थोडे परतून घ्या. नंतर त्यात चिरलेला अरुगुला घालून त्यावर झाकण ठेवा. २-३ सेकंदाने झाकण काढून परता. असे दोन तीन वेळा केले की भाजी चांगली शिजेल. नंतर त्यामध्ये लाल तिखट, धनेजिरे पूड व मीठ घालून परत एकदा भाजी परतून घ्या व झाकण ठेवा. २-३ सेकंदाने झाकण काढून परता. भाजी तयार झाली आहे. या भाजीची चव थोडी उग्र लागते पण छान आहे. करडई भाजीसारखी थोडी चव जाणवली.

दही पालक

जिन्नस :

चिरलेला पालक २ ते ३ वाट्या
दही मोठे २ चमचे/ ताक पाव ते अर्धी वाटी
मीठ चवीपुरते
साखर १ चमचा
डाळीचे पीठ १ चमचा
दाण्याचे कूट १ चमचा
तेल
मोहरी, हिंग, हळद फोडणीसाठी
लाल तिखट अर्धा चमचा
धनेजिरे पूड अर्धा चमचा
मिरच्यांचे तुकडे २-४


मार्गदर्शन : एका पातेल्यात चिरलेला पालक घाला व तो कूकरमध्ये शिजवून घ्या. कूकर गार झाला की पालक बाहेर काढा व डावेने नीट ढवळून घ्या. एकजीव करा. पालक एकजीव केल्यावर त्यामध्ये मिळून येण्याइतपतच डाळीचे पीठ व दही/ताक घाला.नंतर त्यामध्ये लाल तिखट, धनेजिरे पूड, साखर , मीठ व दाण्याचे कूट घाला. सर्व मिश्रण डावेने एकजीव करा/ढवळून घ्या. नंतर मध्यम आचेवर एक पातेले तापत ठेवा. ते पुरेसे तापले की त्यात तेल घाला. ते पुरेसे तापले की त्यात मोहरी, हिंग, हळद घालून फोडणी करा. फोडणीत हिरव्या मिरच्यांचे तुकडे घालून त्यावर पालकाचे तयार केलेले मिश्रण घालून नीट ढवळा. एक उकळी आली की गॅस बंद करा. ही पातळ भाजी गरम भाताबरोबर खूपच छान लागते.

बटाटा भाजी

जिन्नस :

बटाटे ३-४
पाऊण कांदा
३-४ मिरच्या
अर्धा चमचा लाल तिखट
अर्धा चमचा धनेजिरे पावडर
मीठ
साखर
तेल
मोहरी, हिंग, हळद (फोडणीसाठी)

क्रमवार मार्गदर्शन : बटाटे कूकरमध्ये उकडून घ्या. गार झाले की त्याची साले काढून मध्यम आकाराच्या फोडी करा. कांदाही मध्यम आकाराच्या फोडी करून चिरा. मिरच्यांचे तुकडे करा. मध्यम आचेवर कढई तापत ठेवा. ती तापली की त्यात जरूरीपुरते तेल घाला. तेल तापले की त्यात मोहरी, हिंग व हळद घालून फोडणी करा. नंतर त्यात मिरच्यांचे तुकडे व चिरलेला कांदा घाला. परतून घ्या. त्यावर झाकण ठेवा. नंतर काही सेकंदाने झाकण काढा व परत थोडे परता. असे दोन तीन वेळा करा. कांदा कच्चा राहता कामा नये. कांदा शिजला का नाही हे पाहण्यासाठी कालथ्याने शिजलेल्या कांद्यावर थोडे टोचून पहा. कांदा कालथ्याने तुटला की तो शिजला असे समजावे. नंतर त्यात चिरलेले बटाटे घाला व परतून घ्या. ढवळा. नंतर त्यात लाल तिखट, धनेजिरे पूड व चवीप्रमाणे मीठ घाला. थोडी साखर घाला. नंतर परत हे सर्व मिश्रण नीट सर्व बाजूने ढवळा. आता परत झाकण ठेवा. काही सेकंदाने झाकण काढून परत थोडे परता. असे दोन तीन वेळा करा. गॅस बंद करा. भाजीवर झाकण ठेवा. वाफेवर ही भाजी चांगली शिजली की चविष्ट लागते.

या भाजीत कांदा जास्त घालावा म्हणजे डोशाबरोबर बटाट्याची भाजी देतात तशी लागते. वाढताना त्यावर थोडी चिरलेली कोथिंबीर व ताजा खवलेला नारळ घाला. या भाजीत कडीपत्त्ता घातल्यास जास्त चांगली चव येते. कडीपत्ता फोडणीत घालावा.

भरलेली चिली पोबलॅनो

जिन्नस :

चिली पोबलॅनो २
बटाटे मध्यम २
लाल तिखट अर्धा ते पाऊण चमचा
धनेजिरे पूड अर्धा ते पाऊण चमचा
मीठ
पाव लिंबू
लसूण २-३ पाकळ्या बारीक चिरून
कांदा थोडा बारीक चिरून
तेल
सजावटी साठी किसलेले चीझ

क्रमवार मार्गदर्शन : बटाटे उकडून घ्या. उकडल्यावर त्याची साले काढून हाताने बारीक करा. नंतर त्यात कांदा लसूण अगदी बारीक चिरून घाला. लाल तिखट, धनेजिरे पूड, मीठ घालून थोडे लिंबू पिळा. हे झाले मिरचीच्या आतमध्ये भरायचे सारण. मिरची धुवून कोरड्या फडक्याने पुसून घ्या व मध्ये एक चिर पाडा. आता तयार केलेले बटाट्याचे सारण चिर पाडलेल्या भागातून मिरचीमध्ये भरा. मध्यम आचेवर पसरट पॅन ठेऊन त्यात थोडे तेल घाला. ते तापले की लगेचच त्यावर भरलेल्या मिरच्या ठेवा. त्यावर झाकण ठेवा. आता आच एकदम मंद ठेवा. मंद आचेवर या मिरच्या शिजतील. अधून मधून झाकण काढून बघावे. नंतर थोड्यावेळाने अलगद मिरच्या उलटा व परत झाकण ठेवा. दुसऱ्या बाजून मिरची शिजेल. आता परत सुलट्या करा व शिजवा. मंद आचेवर मिरची शिजते.

मिरच्या गार झाल्या की एका ताटलीत काढून त्यावर किसलेले चीझ घाला. अशा पद्धतीची मिरची मेक्सीकन उपहारगृहामध्ये मिळते. पण ती उकडलेली असते. व आतील सारणात पण तिखट मीठ नसते. फक्त उकडलेले बटाटे बारीक करून घातलेले असतात. ही मिरची मी इंडीयन स्टाईलने केलेली आहे. जशी आपण भरली सिमला मिरची करतो तशीच पद्धत आहे. याची चव छान लागली. ही मिरची चवीला अगदी थोडी तिखट असते. आणि शिजल्यावर पण छान वास येतो. ही मिरची फ्राईड राईस किंवा मसालेभाताबरोबर छान लागते. नुसती सुद्धा खायला छान लागते.